दरवर्षीप्रमाणे, यावर्षीही लोकनेते बाळासाहेब देसाई कृषी महाविद्यालयात ५ सप्टेंबर रोजी शिक्षक दिन मोठ्या उत्साहात साजरा करण्यात आला. शिक्षकांनी विद्यार्थ्यांच्या आयुष्यात केलेल्या योगदानाला वंदन करणे, हा या दिवसाचा मुख्य उद्देश होता. या निमित्ताने आयोजित विविध कार्यक्रमांमध्ये शिक्षकांनी भाग घेऊन विद्यार्थ्यांचा उत्साह वाढवला.
कार्यक्रमाची रूपरेषा
अभिवादन आणि आभार:
कार्यक्रमाची सुरुवात मान्यवरांच्या स्वागत आणि शिक्षकांना शुभेच्छा देण्याने झाली. विद्यार्थ्यांनी आपल्या शिक्षकांसाठी सुंदर भाषणे सादर केली.
सांस्कृतिक कार्यक्रम:
विद्यार्थ्यांनी विविध सांस्कृतिक कार्यक्रम सादर केले, ज्यामुळे कार्यक्रमाला एक वेगळेच महत्त्व प्राप्त झाले. या कार्यक्रमातून विद्यार्थ्यांचा कलागुण सर्वांसमोर आला. शिक्षणाबरोबरच कलेचे महत्व विद्यार्थ्यांना समजले.
विविध समूह स्पर्धा :
संगीत खुर्ची, लिंबू चमचा अशा विविध खेळाचे नियोजन करण्यात आले. विद्यार्थ्यांचा सर्वांगीण विकास होण्यासाठी खेळाचे महत्व समजण्यासाठी विविध खेळाचे नियोजन करण्यात आले.
शिक्षकांचे महत्त्व:
या दिवशी, शिक्षकांनी विद्यार्थ्यांचे जीवन घडवण्यासाठी आणि त्यांना बौद्धिक, भावनिक व नैतिकदृष्ट्या सक्षम बनवण्यासाठी केलेल्या कार्याचे स्मरण केले गेले. विद्यार्थ्यांनी विविध विषयाची सखोल तयारी करून तासिका घेऊन शिक्षक व विद्यार्थ्यांना मार्गदर्शन केले.
डॉ. सर्वपल्ली राधाकृष्णन यांची आठवण
हा दिवस भारताचे दुसरे राष्ट्रपती डॉ. सर्वपल्ली राधाकृष्णन यांच्या जन्मदिनाच्या निमित्ताने साजरा केला जातो. ते एक थोर तत्त्वज्ञ, विद्वान आणि शिक्षक होते. त्यांनी शिक्षणाप्रती केलेले कार्य आदर्श मानले जाते.
विद्यार्थ्यांसाठी प्रेरणा
शिक्षक दिन हा विद्यार्थ्यांना आपल्या शिक्षकांबद्दल आदर आणि कृतज्ञता व्यक्त करण्याची एक संधी देतो. शिक्षकांमुळेच विद्यार्थ्यांना योग्य मार्गदर्शन मिळते आणि ते एक उत्तम समाज घडवतात
डॉ. सर्वपल्ली राधाकृष्णन यांची आठवण व त्यांचा जीवन परिचय लोकनेते बाळासाहेब देसाई कृषी महाविद्यालयाचे प्राचार्य डॉ. एस.एम. शिंदे यांनी आपल्या भाषणातून करून दिला. शिक्षक दिनानिमित्त आयोजित केलेल्या सदभावना कार्यक्रमाची प्रस्तावना कु. प्रांजली चव्हाण हिने सादर केली. सदर कार्यक्रमास उपस्थिताचे आभार अस्मिता सूर्यवंशी हिने मानले. या कार्यक्रमास कृषी महाविद्यालयाचे प्राचार्य , शिक्षक- शिक्षकेत्तर कर्मचारी, विदयार्थी -विद्यार्थिनी उपस्थित होते.